أجيو نعاود لكم على واحد الطريق
نفتح لكم قلبي وبلا ما عليكم نعيق
واحد الطريق غريبة عامرة فيراجات
طريق كلكم كتعرفوها طريق سمها الحياة
تلقيت فيها ناس وعرفت فيها ناس
وحدين باقين فالقلب وحدين طلعوا فالراس
تلاقيت فيها حتى شي كائنات
ما عندها فم لكن تهضر كل اللغات
اول من تلاقيت البراءة
شديتلها اليدين بحال شي دري صغير
كانت ضريفة وجميلة ولاكن بلا تجربة
تمشات معايا خطيوات والبراءة ولات غريبة
واحد لوقيتة تلاقيت الحب
قتلو الزين زوين لكن ماكان منك ما صعب
قالي أنا داير جهدي وقلبي حنين
لكن أش غادي ندير الناس هما للي مكلخين
فلول ديال الطريق تلاقيت الصحبة
معاها معمري مليت سنين فاتت وهي ديما شابة
وخا شي مرات خسراتها معايا
من لول ديال الطريق وهي ديما حدايا
قدامي راجل كبير لابس جلباب
مرة نشوفو ناصح مرة يغبر فضباب
مرة نشوفو صغير مرة بحال شي جبل
سولت عليه قالولي هذاك المستقبل
فواحد الدورة بين لابوست و المقاطعة
تلاقيت راجل شارف ومرة باينة مصدعة
مع الرشوة الزور وحوايج عمري شفتهم فالتلفزة
قالي الشاوش هادوك الصبر والنرفزة
أه نسيت ماعاودتليكم على واحد الرومبوان
على ليمن فيه جامع وعلى ليسار سوق و جنان
ناس واقفة من كل جهة وناس كدور
وناس شافت البار لور دارت دوميتور
Tbark allah 3lik : tu dois trouver un chanteur et compositeur pour faire diffuser cet art
RépondreSupprimer