الأمير مول النوار

حاجيتكم على الأمير مول النوار
تلات يام ما نعس تلات يام وهو محتار
جمع الجماعة من بعد صلاة العصر
قاليهم فتيوني راني باغي نبني قصر
نبنيه على الكدية ولا جنب الواد
ولا وسط لميدنة فتيوني ألجواد

الأمير غير كمل مسألتو
ناضو الناس كلها يلغي بلغاتو
للي يقول جنب الواد وللي يقول الكدية
للي يقول وسط لمدينة وللي يقول علاش تبنا هد لخطية

الأمير مسكين زادت حيرتو وبدا يتألم
ولاكن وسط الجماعة راجل كبير قاع متكلم
شافو الأمير رفع يدو والناس قاع سكتات
وقاليه مالك ساكت والناس قاع هضرات
الشيخ ناض وقرب من الأمير
وقالو سيدي كلامك هو لكبير
قبل ما نهضر ونقوليك ما عندي
نحكيليك قصة حكاهالي جدي
سبعين عام هدي

لقصة قصة راجل دريوش و فلاح
فيق ولدو لكبير قبل مايصبح الصباح
قاليه نوض راني عولت نبيع لحمارة
نص المال بيه نعيدو و النص نديرو بيه تجارة

من بعد ما صلاو صلاتهم
مشاو يجهزو حمارتهم
لولد قال إلاركبنا على لحمارة منا لسوق
موحال واش تجيب حتى كيلو برقوق
نكتفوها ونهزوها مرابعة توصل مرتاحة
هكدا نديو فيها التامان ونقضيو لمصلحة

ملي دازو على واحد القرية
الناس شافو لبهيمة معلقة كثريا
قالو ما عرفنا شكون فهاد التلاتة بهيمة
ما عرفنا فين كانو منين تقسمات لفهامة

لفلاح قال لولدو هاد الناس عندهم الصح
نتا تابعك الشقا وانا شارف خصني نرتاح
حل لكوردة ربط اللجام ونشر البردعة
حزم الجلباب وركب مورايا نوصلو فالساعة

ملي وصلو للواد لقاو عيالات كتصبن
قالو هما مبرعين ولبهيمة كتمحن
شوفو الناس للي ما ترحم
لبهيمة مابقا فيها غي لعظم
الله ينعل للي ما يحشم

الولد قال هد لعيالات عندهم الحق
ولحمارة روحها غادي تزهق
خليني نتمشى شوية على الرجل
نصبر راه الطريق قريبة تكمل

غي فاتو القنطرة
لقاو طفلة زوينة فضل الشجرة
قالتلهم الشارف مبرع وما ضارب حساب
يموت ولايحيا هاد زين الشباب

الفلاح دار عند ولدو وقال
أجي تركب أولدي راه هادشي موحال
الشاب جاوبو و قاليه إرتاح ألواليد
إلا تبعنا راي الناس سيدهم والعبيد
ما نقضيو صلاح ما نفرحو بعيد
مانبنيو دار ما نعليو مسيد

القصة سالات سيدي الأمير
المعنى وصل نتا مول لعقل لكبير
لي تبع رايات الناس وهضرتهم
ضر راسو والناس ما يضرهم
جنب الواد علكدية ولا وسط لمدينة
لقصر قصرك ونتا للي غادي تسكنو ماشي حنا